Iceland Airwaves: Mammút – Breyttu gólfklappi í dynjandi lófatak

Fullt var útúr dyrum þegar að Mammút steig á svið í Norðurljósasal Hörpu. Hljómsveitin hefur verið reglulegur gestur á hátíðinni allt frá því að hún sigraði Músíktilraunir árið 2004. Í kvöld höfðu meðlimir Mammút ríka ástæðu til að fagna en fyrir tæpri viku síðan leit platan Komdu til mín svarta systir dagsins ljós en platan er þeirra fyrsta í heil fimm ár.

Af spilamennskunni að dæma var þó ekki að sjá að þetta væru aðeins aðrir tónleikar Mammút eftir að platan kom út. Hljómsveitin er orðin að einhverju miklu meira en vel smurðri vél en eflaust mætti líkja tengslum hljómsveitarmeðlima við óvenju hæfileikaríkan systkinahóp. Sérstakt hrós verður að gefa söngkonu sveitarinnar, Kötu Mogensen, en sviðsframkoma hennar og söngur var í hæsta gæðaflokki.

Einungis nýtt efni var flutt á tónleikunum en nýju lögin eru gríðarsterk og virtust leggjast vel í áhorfendur en þegar þarna var komið við sögu hafði kurteisislega gólfklappið sem einkennt hafði salinn fyrr um kvöldið breyst í dynjandi lófatak, hróp og skræki.

Þekktustu lög nýju plötunnar, Salt og Blóðberg, voru á meðal fyrstu laga sveitarinnar að þessu sinni og varð það mögulega til þess að ákveðin stíganda vantaði í tónleikana, en ljóst er að hljómsveitin er prufa sig áfram með uppruðun laga á tónleikum.