Skoda Octavia besti togarinn

Fyrir marga bíleigendur skiptir það miklu máli að bílar hafi mikla toggetu, enda eiga margir fellihýsi, hjólhýsi, hestakerrur eða annað sem hengt er aftan á bílinn. Bílatímaritin What Car og Practical Caravan Magazine hafa nú fundið út hvaða bílar eru þeir bestu til að draga aftanívagna og það í einum 5 flokkum, en flokkaskiptingin fer alfarið eftir þyngd bílanna. 

Sá bíll sem hafði sigur yfir alla flokkana er Skoda Octavia með 2,0 lítra dísilvél. Volkswagen bílafjölskyldan átti einnig sigurvegara í formi Volkswagen Passat Estate 2,0 TDI BlueMotion. Í flokki bíla yfir 1.900 kíló var það Land Rover Discovery 4 með 3,0 lítra dísilvél sem reyndist bestur og honum fylgdi titillinn „The ultimate, tow-anything tow car“, sem útlagst gæti besti togbíllinn fyrir hvaða aftanívagn sem er.  Aðrir sigurvegarar hinna einstöku þyngdarflokka voru  BMW 330 D, og Jaguar XF.