Stofnaði tískutímarit til að koma hæfileikafólki frá Norðurlöndunum á framfæri

Soffía Theódóra Tryggvadóttir stofnaði tískutímaritið Nordic Style Magazine í desember á síðasta ári. Hún hefur alltaf haft gríðarlegan áhuga á tísku og hönnun en það var fyrst þegar hún hóf nám í tískumarkaðsstjórnun í New York sem henni fannst hún hafa næga þekkingu til að stofna sitt eigið tímarit. Tilgangur tímaritsins er að koma hönnun, listum og tísku frá Norðurlöndunum á framfæri á alþjóðamarkaði.

Soffía er sjálf staðsett í New York og ritstýrir blaðinu þaðan. Það eru þó tæplega 30 einstaklingar í átta löndum sem vinna að næsta blaði sem kemur út um miðjan febrúar. Þar taka þau viðtöl og skrifa greinar í blaðið, vinna að tískuþáttum og taka götutískuljósmyndir hver á sínum stað með hjálp nútímatækni. Allt þetta fólk hefur mikla trú á stefnu blaðsins.

Hvernig hefur verið að vinna blaðið svona á milli landa?

Ég gerði fyrsta tímaritið meðfram skóla þannig að því leitinu til var að það nokkuð strembið en ótrúlega gaman. Það kom mér nokkuð á óvart hvað það var auðvelt að vinna með fólki á milli landa, þrátt fyrir tímamismun. Ef maður vinnur með góðu fólki eins og ég hef verið svo heppin að kynnast þá er þetta lítið mál.

Hvernig hafa viðbrögðin verið?

Viðbrögðin hafa verið ótrúlega góð og við höfum fengið mikinn stuðning og áhuga frá fólki og fyrirtækjum um allan heim. Fólk er sérstaklega hrifin af þeirri áherslu á Norðurlöndin sem tímaritið hefur.

Hvað er svo framundan hjá Nordic Style Mag? Ætlið þið að koma á Reykjavík Fashion Festival?

Ég var að koma heim af tískuvikunni í Kaupmannahöfn og nú er bara að vinna úr þeirri ferð og púsla saman útgáfu tvö sem kemur út núna um miðjan febrúar. Við munum að sjálfsögðu koma á Hönnunarmars og Reykjavík Fashion festival og skrifa um þá viðburði. Við erum mjög spennt að sjá hvernig dagskráin verður.

Næsta tímarit kemur út í næstu viku og má nálgast ókeypis hér.

Nordic Style Magazine á Facebook og Twitter

Nordicstylemag.com