Frumflutti óútgefið lag Sjonna

„Þetta gekk ótrúlega vel. Það var rosalega gaman að fá að syngja þetta lag og leyfa fólki að heyra það," segir Þórunn Erna Clausen.

Óútgefið lag Sjonna Brink, Days Gone By, var frumflutt á minningartónleikum um hann sem voru haldnir í Borgarleikhúsinu á afmælisdegi hans, 29. ágúst. Þá hefði Sjonni, sem var eiginmaður Þórunnar Ernu, orðið 38 ára en hann lést í janúar í fyrra.

„Röddin hans er með í prufuupptöku af laginu og við höfðum það þannig á tónleikunum líka. Þetta var mjög sérstök stund fyrir mig," segir Þórunn Erna, sem samdi sjálf textann en notaði einnig þau orð sem heyrðust skýrt í prufuupptöku Sjonna.

Með Þórunni fluttu Vignir Snær Vigfússon, Pálmi Sigurhjartarson og aðrir fyrrum samstarfsmenn Sjonna lagið á tónleikunum.

„Mér finnst þetta frábært lag eftir Sjonna. Það er algjör synd að hann var ekki búinn að klára textann og syngja það alveg sjálfur en svona er lífið. Við kláruðum þetta fyrir hann og gerðum okkar besta." Til stendur að gefa lagið út seinni hlutann í september og stjórnar Vignir Snær upptökunum.

Aðspurð segist Þórunn Erna vera mjög ánægð með minningartónleikana. „Sjonni var svo frábær tónlistarmaður og lagahöfundur og ég veit ekki hvort fólk áttar sig á því fyrr en það sér þetta á einu kvöldi hversu mikið magn af góðum lögum hann átti," segir hún. „Það voru fimmtán söngvarar sem komu fram og það voru allir að blómstra í öllum lögum. Það var mikil hjartahlýja í salnum, á sviðinu og baksviðs og þetta var bara einstakt. Það voru einhverjir töfrar í loftinu." - fb