Jón Gnarr vekur hrifningu netverja - svarar spurningum um allt milli himins og jarðar

Jón Gnarr, borgarstjóri í Reykjavík, sat fyrir svörum á vefsíðunni Reddit í kvöld. Netverjar voru augljóslega áhugasamir um starf borgarstjórans en hundruð spurninga bárust.

Notendur Reddit, sem eru þúsundir talsins, forvitnuðust um það í gær hvort að Jón væri reiðubúinn að svara spurningum þeirra. Jón birti svar á Fésbókinni í gærkvöld þar sem einfaldlega stóð: „áskorun samþykkt."

Reddit er ein vinsælasta vefsíða veraldar. Hún er nokkurskonar fréttasía þar sem notendur birta og dreifa ljósmyndum, myndböndum, texta eða öðru efni.

Hérna fyrir neðan má sjá nokkrar spurningar og svör sem birtust í umræðunum í kvöld:

TheJoePilato spyr: Hvaða ráðleggingar hefur þú fyrir helstu þjóðarleiðtoga?

Jón: „Verið þið sjálf. Ekki vera ill. Sýnið hluttekningu.

Ginger_breadman spyr: Hver er skoðun þín á hlýnun jarðar?

Jón: „Hnattræn hitnun er staðreynd. Áhrifin á Ísland eru að mestu jákvæð. Veðrið batnar hér með hverju ári."

Krattr spyr: Vilt þú að Ísland gangi í Evrópusambandið?

Jón: „Ég hef enga skoðun á því en ég held að mikilvægi þess séu stórlega ofmetin."

Telecastah spyr: Sæll Jón. Leynivinur gaf mér flösku af Ópal. Hvernig mælirðu með að maður innbyrði það?

Jón: „Ég myndi ekki gera það."

Dabbistify spyr: Hvað er það sem þú sérð mest eftir?

Jón: „Ég vildi að ég hefði klárað skólann og orðið taugavísindamaður."

FHayek spyr: Ertu hræddur við dóttur þína? Hún er ansi sterk.

Jón: „Nei. Hún myndi aldrei lemja mig. Held ég."

Letterbocks spyr: Sæll Jón. Hvað segirðu um verk Hugleiks Dagssonar?

Jón: „Hann er frábær. Ég er einmitt móðir hans."

Hægt er að nálgast umræðurnar í heild sinni hér.