51 lax og 17 bleikjur í Andakílsá

Veiði í Andakílsá hefur verið fremur döpur það sem af er sumri. Samkvæmt upplýsingum á vef Stangaveiðifélags Reykjavíkur hafði 51 lax veiðst í ánni á hádegi í gær.

"Að auki hafa verið skráðar til bókar 17 bleikjur, en fyrrum silungasvæði árinnar fylgir nú laxahlutanum. Frá 25. júlí til - 1. ágúst veiddust 7 laxar. Í kjölfarið kom einn lax upp 2/8 og annar 4/8 samkvæmt upplýsingum frá Þorsteini Ólafs sem sendi okkur línu um gang mála," segir á vef SVFR.

Veitt er á tvær stangir í Andakílsá. Í fyrra veiddust 180 laxar í ánni og 332 sumarið 2010, sem er mjög góð veiði. Þess má geta að veiðin í ánni var stórkostleg árin 2009 og 2008. Árið 2008 veiddust 839 laxar og 706 árið á eftir.

trausti@frettbladid.is