Bjarni Ólafur tapaði gegn Birki Má | Enn tapar Stabæk

Ekkert gengur hjá Bjarna Ólafi Eiríkssyni og félögum hans í norska úrvalsdeildarliðinu Stabæk. Liðið tapaði enn einum leiknum í dag 2-1 á útivelli gegn Birki Má Sævarssyni og félögum í Brann.

Jamaíkamaðurinn á miðjunni hjá Brann, Rodolph Austin, kom heimamönnum yfir strax á 4. mínútu með marki úr vítaspyrnu.

Nígeríumaðurinn Kim Ojo kom Brann í 2-0 með marki á 18. mínútu. Þetta var fimmta mark framherjans í þrettán leikjum.

Christer Kleiven minnkaði muninn fyrir Stabæk á 60. mínútu en lengra komust gestirnir ekki.

Með sigrinum lyfti Brann sér upp í 7. sæti deildarinnar tímabundið hið minnsta en fjölmargir leikir fara fram í deildinni í dag.

Birkir Már og Bjarni Ólafur spiluðu allan leikinn með liðum sínum.