Heimsmeistari úr leik

Heimsmeistarinn í fjórgangi í hestaíþróttum er úr leik á Landsmótinu í Víðidal eftir að hún viðbeinsbrotnaði í keppni í b-flokki gæðinga í gær. Heismeistarinn, Berglind Ragnarsdóttir, var að keppa á Frakki frá Laugavöllum þegar óhappið varð. Hún segir að það hafi verið bleyta á vellinum sem olli því að hesturinn rann og missti fótana þegar hann var á stökki

Berglind segir að hesturinn sé í ágætu ástandi. „Hann er bara nokkuð góður, aðeins marinn og búinn að fá bólgueyðandi og svona. En það eru allar lappir heilar og allt svoleiðis," segir hún. Því miður verður ekki hið sama sagt um knapann því hún þríviðbeinsbrotnaði. „Ég get ekki keppt það sem eftir er sumarsins. Það er það sem mér finnst verst," segir hún og er ekki farin að sjá hvenær hún geti keppt aftur.

Berglind er búin að keppa á hestum í þrjátíu ár og segir að þetta sé í fyrsta sinn sem hún hafi beinbrotnað. Hún segir að þrátt fyrir þetta óhapp sé Landsmótið í Víðidal vel heppnað og hún hlakkar til að fylgjast með mótinu úr brekkunum. „Þetta er tímamótamót. Þetta er flottasta umgjörð sem hefur verið á Landsmóti. Við viljum hafa Landsmót þar sem aðstaða fyrir hesta og menn er til fyrirmyndar," segir hún. Hún bendir jafnframt á að útlendingar sæki í staði þar sem er hótelaðstaða eins og í Reykjavík. „Ferðaþjónustan nýtur bara góðs af. Það verður gaman að sjá hversu margir koma um helgina," segir Berglind um þá möguleika sem mótið færir ferðaþjónustunni.

Í meðfylgjandi myndasafni getur þú séð myndir af því þegar óhappið varð.