Haukar lögðu Fram eftir framlengingu | Stórsigur ÍA á Tindastóli

ÍA, Haukar, HK/Víkingur og Keflvík tryggðu sér í kvöld sæti í 16-liða úrslitum Borgunar-bikars kvenna í knattspyrnu en liðin lögðu andstæðinga sína að velli í kvöld.

Haukar 3-1 Fram

Haukar lögðu Fram að velli 3-1 að Ásvöllum í Hafnarfirði. Fjóla Sigurðardóttir kom gestunum yfir á 60. mínútu en Sædís Kjærbech Finnbogadóttir jafnaði tólf mínútum fyrir leikslok.

Í framlengingunni reyndust Hafnfirðingar sterkari. Katrín Hulda Guðmundsdóttir kom þeim yfir á 101. mínútu og Hildigunnur Ólafsdóttir gulltryggði sigurinn með marki undir lok framlengingar.

HK/Víkingur 2-1 Grindavík

Spennan var einnig mikil á Kópavogsvelli þar sem HKVíkingur lagði Grindavík 2-1. Gestirnir komust yfir undir lok fyrri hálfleiks með marki Þórkötlu Sifjar Albertsdóttur.

Heimakonur svöruðu með tveimur mörkum í síðari hálfleik. Fyrst skoraði Karen Sturludóttir og það var svo Elma Lára Auðunsdóttir sem skoraði sigurmark HK/Víkings.

ÍA 7-0 Tindastóll

Á Akranesi tóku heimakonur Tindastól í kennslustund 7-0. Skagakonur komust tveimur mörkum yfir í fyrri hálfleik með tveimur mörkum með skömmu millibili.

Í síðari hálfleik opnuðust allar flóðgáttir í vörn Stólanna. Skagakonur gengu á lagið, skoruðu fjögur mörk og lönduðu öruggum 7-0 sigri.

Guðrún Karítas Sigurðardóttir og Alexandra Björk Guðmundsdóttir skoruðu tvö mörk hvor og þær Helga Sjöfn Jóhannesdóttir, Dúna Sturlaugsdóttir og Elísa Svala Elvarsdóttir sitt markið hver.

Sindri 1-3 Keflavík

Keflavík gerði góða ferð á Hornafjörð og vann 3-1 sigur á Sindra.

Annað kvöld mætast Fjölnir og Þróttur Reykjavík í Grafarvogi. Þá spila Höttur og Fjarðabyggð/Leiknir á fimmtudagskvöldið um síðasta lausa sætið í 16-liða úrslitum keppninnar.

Upplýsingar um markaskorara að hluta frá urslit.net.