Ágúst og Rakel Dögg stofna saman Handknattleiksakademíu

Ágúst Jóhannsson landsliðsþjálfari kvenna og Rakel Dögg Bragadóttir fyrirliði landsliðs kvenna í handknattleik, hafa stofnað saman Handknattleiksakademíu Íslands og munu standa fyrir námskeiðum fyrir stelpur og stráka á aldrinum 13-18 ára.

Ágúst segir í fréttatilkynningu að markmið akademíunnar sé að bæta tækni og leikskilning sérhvers einstaklings auk þess að kynna leikmönnum fyrir afreksmannaþjálfun og afreksmannaæfingaumhverfi.

„Við töldum mikla þörf á því að bjóða hér á landi fyrsta flokks afreksþjálfun í handknattleik, svipað því sem tíðkast í nágrannalöndum okkar. Slíkar akademíur hafa skilað miklum árangri og skapað þjóðum ákveðið samkeppnisforskot í útbreiðslu, þátttöku og árangri í íþróttinni," sagði Ágúst.

Rakel Dögg segir í fréttatilkynningunni að þörfin hafi sannarlega verið fyrir hendi því uppselt sé á fyrstu námskeiðin. "Við viljum þakka fyrir frábær viðbrögð við Handknattleiksakademíu Íslands og Lenovo. Greinilega löngu orðið tímabært að bjóða upp á afreksskóla í handbolta og það er gaman að sjá hversu margir krakkar hafa brennandi áhuga og metnað," sagði Rakel í umræddri fréttatilkynningu.

Lenovo og Nýherji hafa hafið samstarf við Handknattleiksakademíu Íslands og námskeiðin verða undir merkjum Handknattleiksakademíu Íslands og Lenovo tölvuframleiðandans.