Samherji fær gögn frá gjaldeyriseftirlitinu

Gjaldeyriseftirlit Seðlabanka Íslands hefur afhent Samherja þau gögn sem lágu til grundvallar þegar Héraðsdómur úrskurðaði um heimild til húsleitar og haldlagningar gagna hjá Samherja og tengdum félögum þann 27. mars síðastliðinn.

Í tilkynningu frá Samerja hf. segir að gögnin renni stoðum undir það sem forsvarsmenn fyrirtækisins hafi haldið fram.

„Af lestri gagnanna má ljóst vera að þær ályktanir sem gjaldeyriseftirlit Seðlabanka Íslands hefur dregið eru að verulegu leiti byggðar á rangfærslum um eðli og framkvæmd viðskipta Samherja og tengdra félaga," segir í tilkynningu frá Samherja.

Þá fordæma forsvarsmenn Samherja þá harkalegu aðgerð sem beitt var með húsleit og haldlagningu gagna.

„Hæglega hefði mátt komast hjá því tjóni með fyrirspurnum til Samherja. Slíkum fyrirspurnum hefði að sjálfsögðu verið svarað, eins og fjölmörgum öðrum sem borist hafa frá Seðlabankanum undanfarin ár."