Dettur í hátíðargírinn þegar tréð er skreytt

Stefán Hilmarsson hefur sent frá sér sína fimmtu sólóplötu sem ber heitið Húm (Söngvar um ástina og lífið). Margir af fremstu lagasmiðum landsins lögðu Stefáni til lög og óhætt er að segja að platan sé uppfull af gæðatónlist.

Vísir hafði samband við Stefán til að forvitnast hvað kemur honum í jólagírinn.

„Jólastemmningin hefst í upphafi aðventu, þegar konan vinnur ötullega að því að breyta húsinu í hálfgert jólaþorp," svarar Stefán.

„Hún er mikið jólabarn og synirnir verða auðvitað spenntir þegar skreytingaræðið rennur á mömmuna, sérstaklega sá yngri, sem er uppveðraður yfir heimsókn jólasveinanna og maður smitast vitaskuld af einlægri barnsgleðinni."

„En ég dett ekki í fimmta hátíðargírinn fyrr en rétt fyrir jól, þegar rjúpurnar koma í hús og tréð er skreytt. Og ekki er verra ef þá fer að snjóa, eins og í bíómyndunum," segir Stefán. - jol@jol.is