Sjónvarpskona hljóp maraþon í New York

„Ég eignaðist stelpuna mína fyrir einu og hálfu ári og byrjaði að hlaupa til að koma mér í form eftir það. Svo bara endaði þetta svona. Ég hefði aldrei trúað að ég myndi gera þetta fyrir nokkrum árum,“ segir Sigríður Halldórsdóttir sjónvarpskona, sem hljóp um helgina heilt maraþon í New York-borg.

„Þetta var eiginlega svolítið óvart. Það er frekar erfitt að komast inn í þetta hlaup og maðurinn minn sótti bara um fyrir okkur bæði. Þetta er lotterí og mér skilst að einn af hverjum sex úr pottinum fái að taka þátt. Við vorum svo heppin að vera bæði dregin út en ekki bara annað okkar. Þá var ekkert annað að gera en að koma sér í nægilega gott form til að geta þetta,“ segir Sigríður, sem starfar í Landanum á RÚV.

New York-maraþonið er með þeim stærri í heiminum og á hverju ári taka um 50.000 manns þátt í hlaupinu. Sigríður segir stemninguna hafa verið ótrúlega enda hafi um 2,5 milljónir manns fylgst með hlaupurunum og hvatt þá áfram. „Mér gekk ótrúlega vel og þetta var frekar áfallalaust. En eftir 30 kílómetra hlaup líður manni bara ömurlega alls staðar í líkamanum.

Hvert einasta skref og hver einasta hreyfing er hreinn sársauki. Léttirinn sem flæðir yfir mann við marklínuna er rosalegur og mörgum klukkutímum seinna kemur síðan ánægjan. Fyrsta maraþonið snýst svolítið um það að ná bara að klára. Það tókst og ég er ótrúlega sátt.“- bb