Hell-víti öflugt

Tónlist. Stop That Noise. Hellvar.



Á fyrstu plötu sinni döðruðu Heiða Eiríksdóttir og Elvar Geir Sævarsson við elektróníska tónlist og notuðust við forritaðan trommuheila. Núna er Hellvar orðið fimm manna band og fyrir vikið hafa áherslunar breyst og rokkið orðið meira áberandi þó svo að rafpælingarnar séu aldrei langt undan.

Stop That Noise var tekin upp „live" á einni helgi og það skilar sér í fínni, nokkuð hrárri rokkplötu, þar sem falleg söngrödd Heiðu nýtur sín vel, hvort sem tungumálið er franska eða enska. Lögin eru flest góð en fyrri helmingurinn er ívið betri, með pönktryllinum svala I Should Be Cool og hinu hljómfagra Morceau de gaieté, sem ég get vel ímyndað mér að svínvirki á tónleikum, rétt eins og Too late, liar þar sem kröftugur gítarleikurinn og trommurnar ná þrusuvel saman.

Niðurstaða: Fínt rokk með elektróník í bland sem ætti að njóta sín til fullnustu á tónleikum.