Óttast að bandarísk hlutabréf hrynji

Hlutabréfamarkaðir í Evrópu hafa lækkað í dag en þó ekki eins mikið og óttast var. Yfirlýsingar Seðlabanka Evrópu um að kaupa skuldabréf verst stöddu ríkjanna réð þar mestu um. Óttast er að bandarísk hlutabréf hrynji við opnun markaða klukkan hálf tvö.

Mikið hefur verið um sviptingar á fjármálamörkuðum í morgun. Í nótt sýndu markaðir í Asíu mikla lækkun, til dæmis lækkaði Nikkei vísitalan í Japan um 2,4 prósent og verð á hlutabréfum í Hong Kong, Suður-Kóreu og á Indlandi lækkaði um þrjú til fimm prósent. Þegar hlutabréfamarkaðir í Evrópu opnuðu klukkan sjö í morgun lækkuðu helstu vísitölur álfunnar til að byrja með en síðan dróg úr lækkuninni þegar líða tók á morguninn og var jafnvel vart við hækkun á sumum mörkuðum. Talið er að yfirlýsingar Seðlabanka Evrópu þar sem gefið er til kynna að bankinn ætli sér að kaupa upp skuldir ríkissjóða álfunnar sem verst eru staddir hafi haft einhver áhrif á órólega fjárfesta. Þá hafa G7 ríkin lýst yfir sameiginlegu átaki til að viðhalda fjármálastöðugleika og efnahagsbata. Yfirlýsingarnar virðast hins vegar ekki hafa dugað til en nú fyrir fréttir sýndu allar helstu vísitölur í Evrópu lækkun um eitt til tvö og hálft prósent en um þrjár klukkustundir eru þar til markaðir loka.

Mikil eftirvænting er fyrir opnun markaða í Bandaríkjunum klukkan hálf tvö að íslenskum tíma en bandarískar vísitölur hafa lækkað um meira en tvö komma fimm prósent í framvirkum viðskiptum utan markaða í dag. Standard and Poors lækkuðu lándshæfiseinkunn Bandaríkjanna á föstudaginn eftir lokun markaða og því óttast að viðbrögð fjárfesta við lækkuninni muni koma fram í dag.

Þá hefur verð á gulli rokið upp í dag og er nú í fyrsta skipti komið yfir 1700 dollar únsan en það er þekkt aðferð fjárfesta að sækja í góðmálma þegar hlutabréfamarkaðir titra.