Monty gagnrýnir harðlega hvernig valið var í ráshópa á US Open

Skotinn Colin Montgomerie, sem var fyrirliði Ryderliðs Evrópu í síðustu keppni, er alls ekki sáttur við hvernig mótshaldarar á opna bandaríska meistaramótinu röðuðu kylfingum í ráshópa fyrstu tvo keppnisdagana.

„Monty“ er einn sá reyndasti í faginu og hann segir að þetta sé versta ákvörðun  sem gerð hafi verið á stórmóti í golfi. Þrír efstu kylfinganir á heimslistanum eru saman í ráshóp, þeir Luke Donald, Lee Westwood og Martin Kaymer, og engin tilviljun réði þeirri ákvörðun mótshaldara.

Tiger Woods er ekki á meðal keppenda og mótshaldarar vildu auka sjónvarpsáhorfið með öllum tiltækum ráðum. Spánverjarnir Miguel Angel Jimenez, Sergio Garcia og Alvaro Quiros eru t.d. saman í ráshóp. Og „Monty“ gagnrýnir harðlega þá ákvörðun að hafa ítölsku bræðurnar Eduardo og Francesco Molinari saman í ráshóp með ítalska ungstirninu Matteo Manassero.

„Þetta er það versta sem gert hefur verið á stórmóti frá upphafi. Að mínu mati er þetta skortur á skynsemi. Hver setur bræður saman í ráshóp?, og meira að segja tískan fær að ráða því hvernig var valið,“  sagði „Monty“ og vitnaði þar í að Rickie Fowler og Ian Poulter eru saman í ráshóp.

„Ég hef leikið á 60 stórmótum, og þetta er það versta sem ég hef séð. USGA fór langt yfir strikið,“  sagði Monty.