Eyjólfur skoraði bæði mörkin í sigri GAIS

Eyjólfur Héðinsson var hetja sinna manna í GAIS er hann skoraði bæði mörkin í 2-0 sigri á Häcken á útivelli í sænsku úrvalsdeildinni í gær.

Fyrra markið skoraði hann undir lok fyrri hálfleiks og það síðara á 59. mínútu leiksins. Eyjólfur lék allan leikinn, rétt eins og Hallgrímur Jónasson.

Þá vann Halmstad 1-0 sigur á Gefle á heimavelli í sömu deild. Jónas Guðni Sævarsson var ekki í leikmannahópi fyrrnefnda liðsins að þessu sinni.

GAIS er í fimmta sæti deildarinnar með fjórtán stig eftir níu leiki, rétt eins og Halmstad sem er í sjötta sætinu.