Íslenskir kylfingar ósáttir við að klukkunni verði seinkað

Stjórn Golfsambands Íslands er allt annað en sátt við frumvarp um að seinka klukkunni á Íslandi og segir að það muni skerða tíma til golfiðkunar á sumrin.

Skiptar skoðanir eru meðal almennings um klukkufrumvarpið svokallaða sem lagt var fram á Alþingi á dögunum en í því er lagt til að klukkunni verði seinkað um einn tíma af ýmsum ástæðum.

Ef frumvarpið verður samþykkt þurfa kylfingar á Íslandi að hætta að spila golf fyrr á kvöldin í kringum þann takmarkaða tíma á sumrin sem hægt er að spila golf allan sólarhringinn.

Þetta er áhyggjuefni hjá golfsambandinu þar sem málið var til umræðu á stjórnarfundi um helgina.

„Flestir spila golf eftir vinnu og það er ákveðin sérstaða hér á Íslandi hvað menn geta spilað lengi. Við erum með stuttan spilatíma þannig að þetta myndi skerða þá nýtingu. Maður myndi halda í því árferði sem er þá þurfum við að leita allra hagræðinga," sagði Hörður Þorsteinsson, framkvæmdastjóri GSÍ, í samtali við Hans Steinar Bjarnason í kvöldfréttum Stöðvar 2 en það má sjá fréttina með því að smella hér fyrir ofan.

Hörður segir þetta kosta breytingar á bókunarkerfum og skapa vannýtingu á mannvirkjum eins og íþróttamannvirkjum og að það sé ekki tímabært í árferðinu sem er í dag. Þetta hefur líka áhrif á miðnæturgolfið sem er orðið vinsælla og vinsælla með hverju árinu.

„Við höfum verið að markaðssetja íslenskt golf erlendis og við teljum að þarna sé verið að skerða þá möguleika. Útlendingar hafa mjög gaman að því að spila hér á kvöldin og inn þessar sumarnætur okkar. Þarna verður tekjuskerðing hjá klúbbunum," sagði Hörður.

Golfsambandið ætlar að koma athugasemdum sínum til þingmanna á næstu dögum.

„Okkur finnst eðlilegt að þeir fái að heyra af þeim áhyggjum sem hafa komið upp innan hreyfingarinnar og meti þær síðan þegar þeir ákveða hvort að þessar breytingar séu skynsamlegar eða ekki. Þetta gæti líka verið spurning um að vera með sumartíma og vetrartíma," sagði Hörður.