Öskubuskuævintýri Dokic lokið

Dinara Safina komst í morgun í undanúrslit á opna ástralska meistaramótinu í tennis eftir sigur á hinni áströlsku Jelenu Dokic.

Framganga Dokic á mótinu hefur verið með hreinum ólíkindum. Hún fékk þátttökurétt með svokölluðu Wild Card-korti og kom öllum að óvörum með því að komast alla leið í fjórðungsúrslitin.

Dokic er fædd í Serbíu en hóf keppnisferil sinn fyrir hönd Ástralíu. Hún keppti svo fyrir Serbíu frá 2001 til 2005 en söðlaði svo aftur um. Dokic var á hátindi ferils síns í upphafi áratugarins en lítið hefur gengið hjá henni undanfarin ár, þar til nú.

Viðureignin í dag var æsispennandi. Safina vann fyrsta settið, 6-4, en Dokic komst 3-0 yfir í öðru setti. Safina náði þó að jafna metin en tapaði þó uppgjöf í stöðunni 5-4 og þar með settinu 6-4.

Safina byrjaði þó oddasettið á því að vinna uppgjöf af Dokic í fyrstu lotu og komst því í 2-1 og 4-3. En þá svaraði Dokic með því að vinna uppgjöf af Safinu og jafnaði þá metin, 4-4.

En Safina svaraði strax og vann næstu lotu og kom sér þar með í lykilstöðu. Hún átti uppgjöf í næsta setti en Dokic komst óvænt yfir, 40-15. Safina náði þó að svara fyrir sig og vann næstu fjögur stig og þar með viðureignina.

Safina mætir löndu sinni, Veru Zvonarevu frá Rússlandi, í undanúrslitunum. Zvonareva vann Marion Bartoli frá Frakklandi í nótt, 6-3 og 6-0.

Það er reyndar möguleiki á því að hin undanúrslitin verði einnig alrússnesk ef Elena Dementieva og Svetlana Kuznetsova komast áfram úr sínum viðureignum í fjórðungsúrslitunum.