Ragnar enn á skotskónum

Varnarmaðurinn Ragnar Sigurðsson heldur áfram að fara á kostum í sænska boltanum. Ávallt traustur í vörninni og hann er þess utan farinn að skora grimmt fyrir félag sitt IFK Göteborg.

Ragnar skoraði þriðja mark Gautarborgarliðsins í kvöld sem lagði Gefle, 3-0, á Gamla Ullevi.

Ragnar lék allan leikinn og fékk gult spjald á lokamínútunni. Hjálmar Jónsson var ekki í leikmannahópi liðsins að þessu sinni.

Göteborg komst með sigrinum í toppsæti deildarinnar, er jafnt að stigum við Helsingborg en með betri markatölu.