Valskonur komnar í úrslitaleikinn - Hrafnhildur í stuði

Valskonur tryggðu sér sæti í úrslitaleik kvenna í Flugfélags Íslands Deildarbikarnum með 31-26 sigri á Haukum á Strandgötu. Haukar byrjuðu vel og náðu fimm marka forskoti í fyrri hálfleik en þær réðu ekkert við Hrafnhildi Skúladóttur sem átti stórleik.

Haukaliðið komust í 5-1 og 9-5 en góður endasprettur Valsliðsins kom liðinu yfir í 15-14 fyrir hálfleik. Hrafnhildur Skúladóttir endaði hálfleikinn með því að skora mark sekúndu áður en hálfleiksflautan gall.

Haukaliðið hélt aðeins í Valsliðið á upphafsmínútum seinni hálfleiks en fjögur Valsmörk í röð komu liðinu í 20-16 og eftir það var mótspyrna Haukaliðsins úr sögunni. Valsliðið nýttu sér hver mistök Haukaliðsins á fætur öðrum og skoruðu hvert markið á fætur öðru úr hraðaupphlaupum.

Valsliðið náði mest níu marka forskoti en Haukaliðið náði að minnka muninn aðeins í lokin. Þegar upp var staðið hafði Valur unnið öruggan fimm marka sigur, 31-26.

Hrafnhildur Skúladóttir átti stórleik hjá Val og skoraði 11 mörk en það kom ekki að sök að Berglind Íris Hansdóttir var ekki í marki liðsins því Sunneva Einarsdóttir stóð sig vel í hennar forföllum. Brynja Steinsen sýndi líka gamla takt og skoraði 5 mörk fyrir Val.

Ramune Pekarskyte (10 mörk) og Erna Þráinsdóttir (8 mörk) voru í sérflokki í sóknarleik hauka og Bryndís Jónsdóttir varði vel í markinu. Hanna Guðrún Stefánsdóttir og Nína Björk Arnfinnsdóttir spiluðu ekki með Haukum í dag og munaði miklu um það fyrir stelpurnar hennar Díönu Guðjónsdóttur.

Valur mætir annaðhvort Stjörnunni eða Fram í úrslitaleiknum á morgun en seinni undanúrslitaleikurinn fer fram klukkan 18.00 í dag.

Valur-Haukar 31-26 (15-14)

Mörk Vals: Hrafnhildur Skúladóttir 11, Brynja Steinsen 5, Anna Úrsúla Guðmundsdóttir 4, Ágústa Edda Björnsdóttir 2, Íris Ásta Pétursdóttir 2, Rebekka Rut Skúladóttir 2, Nína Kristín Björnsdóttir 2/2, Soffía Rut Gísladóttir 1, Arndís María Erlingsdóttir 1, Hildigunnur Einarsdóttir 1. Sunneve Einarsdóttir varði 17 skot.

Mörk Hauka: Ramune Pekarskyte 10, Erna Þráinsdóttir 8, Ester Óskarsdóttir 3, Erla Eiríksdóttir 1, Sandra Sif Sigurðardóttir 1, Tatiana Zukovska 1, Þórunn Friðriksdóttir 1, Tinna Guðrún Barkardóttir 1. Bryndís Jónsdóttir varði 23 skot.