Atli: Börðumst fyrir þessu stigi

„Eins og komið var þá verð ég að vera sáttur við þetta stig," sagði Atli Hilmarsson, þjálfari Stjörnunnar, eftir 24-24 jafnteflið við Val í N1-deild kvenna í kvöld.

„Mér finnst mjög gott að hafa náð stigi með Berglindi á móti sér í þessum ham," sagði Atli og er þá að tala um Berglindi Hansdóttur í marki Vals sem varði 24 skot í kvöld.

„Þetta leit ekki vel út í seinni hálfleiknum en mitt lið barðist fyrir þessu stigi og ánægjulegt að það tókst að ná í það. Þetta var ekki einn af okkar betri leikjum. Í fyrri hálfleik fengum við tækifæri til að fara lengra fram úr þeim en í staðinn lentum við tveimur mörkum undir í hálfleik."