Umfangsmesta aprílgabb gærdagsins

Bílasalan Bílamarkaðurinn í Kópavogi átti sennilega besta aprílgabbið í ár. Þröstur Karelsson sölustjóri Bílamarkaðsins segir að ákveðið hefði verið að setja hálfsíðu auglýsingu í Fréttablaðið og var hönnuð heimasíða í tilefni þess að nýr fjármögnunaraðili í bílalánum væri komin á Íslenskan markað, Brabus Invest sem byði Íslendingum uppá bílalán á þýskum 4.15% vöxtum, með m.a. möguleika á að taka gamla lánið upp í.

Hundruðir lánsumsókna komu í gegnum vefinn www.lifiderlan.is, netþjónninn sprakk um hádegisbilið í gær og þurfti að setja heimasíðuna inná hraðari netþjón, en þegar mesta umferðin var voru yfir 600 aðilar inni á henni í einu. Ákveðið var því að láta vita af aprílgabbinu upp úr klukkan 19:00 þar sem fyrirtækið hafði ekki undan við að svara lánsumsóknum. Enn er góð umferð inná síðuna.

Vegna mikils áhuga hefur Bílamarkaðurinn ákveðið að gera heimasíðuna að upplýsingasíðu fyrir þá aðila sem ætla að taka bílalán á Íslandi í framtíðinni.

Þar verða upplýsingar og samanburður þeirra aðila sem bjóði bílalán vera á einum stað ásamt fréttum um bílamarkaðinn á Íslandi.

„Við heyrðum af einum yfirmanni bílalánafyrirtækis sem kom að máli við undirmann sinn í gær með úrklippuna úr Fréttablaðinu, ekki alveg viss hvað væri í gangi, ha þýsk bíla fjármögnun á Íslandi?," segir Þröstur.

Hér má sjá nokkrar af fyrirspurnunum sem bárust Bílamarkaðnum.

Fyrirspurnir af netinu

Finnst vanta reiknivél inná vefinn hjá ykkur..... Takið þið Avant lánið mitt upp í. … Bestu kveðjur og gangi ykkur vel í hörðum heimi….

Er til í að skipta yfir til ykkar...

Þetta er Benz sem ég er að flytja inn frá USA .....

Ég vil að þið gefið mér tilboð í lán uppá 3 milljónir í 50% Svissneskum Franka og 50% japönsk jen í 6 ár einnig hver er lántökukostnaðurinn



Þröstur bað alla innlegrar afsökunar að lokum en bætti við að hláturtaugarnar væru vart að ná sér.