Ragnar skoraði þegar Gautaborg burstaði Sundsvall

Tveir leikir voru í sænsku úrvalsdeildinni í fótbolta í kvöld. Það var Íslendingaslagur þegar Gautaborg vann 5-0 útisigur á Sundsvall.

Ragnar Sigurðsson og Hjálmar Jónsson léku báðir allan leikinn fyrir Gautaborg en Ragnar skoraði þriðja mark leiksins.

Ari Freyr Skúlason og Hannes Sigurðsson voru báðir í byrjunarliði Sundsvall en Ari fór af velli eftir 40 mínútna leik.

Gautaborg er með 41 stig í fjórða sæti deildarinnar en Kalmar situr í toppsætinu með 54 stig. Sundsvall er með átján stig í næstneðsta sæti sem er fallsæti.

Þá gerðu Örebro og Norrköping 2-2 jafntefli í sænska boltanum í kvöld.