Færa eignir til Invik

Íslenskar eignir fjármálafyrirtækisins Milestone verða frá og með þessu ári færðar undir sænsku fjármálasamstæðuna Invik, dótturfélag Milestone. „Eftir eignafærsluna á árinu 2008 munu öll fyrirtæki Milestone verða dóttur­félög Invik, þar með talin íslensku fjármála­fyrirtækin Sjóvá, Askar Capital og Avant,“ segir í tilkynningu vegna ársuppgjörs fyrirtækisins.

Tilfærslan er samkvæmt heimildum blaðsins hluti af straumlínulögun fyrirtækjastarfsemi Milestone og sóknar inn á norrænan fjármálamarkað. „Meira en 75 prósent af eignum Milestone eru á erlendri grundu og það liggur fyrir að fram­tíðar­vöxtur fyrirtækisins verður á Norður­löndum. Aukin áhersla á uppbyggingu fjármálafyrirtækja okkar utan Íslands er rökrétt skref fyrir félagið,“ er haft eftir Guðmundi Ólasyni, forstjóra Milestone, í tilkynningu félagsins.