Bæjarfulltrúi mótfallinn aldurstakmörkunum á tjaldsvæði

Oddur Helgi Halldórsson, bæjarfulltrúi Lista fólksins, á Akureyri er mótfallinn ákvörðunum um að loka tjaldsvæðum á Akureyri fyrir hluta fólks.

"Að gefnu tilefni vil ég taka fram að ég tók ekki þátt í þeirri ákvörðun, að loka tjaldsvæðunum á Akureyri fyrir hluta fólks. Ég vissi ekki af þessu fyrr en það kom fram í fjölmiðlum. Ég tel þessa ákvörðun ranga og efast um að hún standist lög. Það er skylda okkar bæjaryfirvalda að taka vel á móti gestum okkar, sem og að hlúa vel að íbúum bæjarins. Fyrir mér er hátíðin "Ein með öllu", ekki vandamál, heldur verkefni," segir í yfirlýsingu frá Oddi.