Sýningin Skeifnasprettur 2006 lauk í dag

Skeifnasprettur 2006 lauk í dag í Ölfushöllinni og var mikið um skemmtilegar uppákomur. Sýnd var heitjárning á stærsta hesti Íslands, minnsti hestur Íslands fékk álímda skó og voru þeir svo sýndir í reið strax á eftir. Hans og Gréta, móðurlausu tvíburafolöldin frá Feti, komu, sáu og sigruðu og áttu hug og hjörtu áhorfenda og var stórræktandinn Brynjar Vilmundarson eins og gæsamamma inní höllinni þar sem tvíburarnir eltu hann út um allt, enda hefur Brynjar gengið þeim í móðurstað eftir að móðir þeirra féll frá þegar folöldin voru aðeins nokkurra daga gömul.

Þarna sýndi Brynjar Vilmundarson á sér nýja og mjúka hlið og mátti sjá það hversu vænt honum þykir um þessa tvíbura sem að eru undan Árna Geir og Skák frá Feti. Í lokin voru sýndir stórglæsilegir stóðhestar, en þó ekki í reið og var það Kristinn Guðnason sem las tölu yfir þeim öllum en það voru meðal annars Vilmundur frá Feti, Þeyr frá Akranesi, Þóroddur frá Þóroddsstöðum, Þokki frá Kýrholti, Rökkvi frá Hárlaugsstöðum, Fursti frá Stóra-Hofi og Sær frá Bakkakoti sem gerði sér lítið fyrir og heimsótti kynningarbás Hestafrétta eins og sést á meðfylgjandi mynd.

Skeifnasprettur 2006 er sýning sem er komin er til að vera þó svo að flestir hafi orðið fyrir vonbrigðum með aðsókn að henni.

Myndir frá sýningunni eru komnar inná myndasafn Hestafrétta undir möppunni "sýningar"