Ellefu handteknir og lagt hald á fíkniefni

Lögreglan á Selfossi handtók ellefu manns og lagði hald á nokkuð af fíkniefnum í þremur húsum í Árneshverfinu í uppsveitum Árnessýslu í gær.

Upphaflega var tilkynnt um að bíll hefði farið útaf, en þegar lögreglumenn og sjúkraflutningamenn voru að hlynna að ökumanni, brjálaðist hann skyndilega og réðst á þá. Leiddi þá hvað af öðru og naut Selfoss lögreglan aðstoðar manna frá Ríkislögreglustjóra og Tollgæslunni, sem mættu á vettvang með fíkniefnahund. Yfirheyrslum lauk ekki fyrr en undir miðnætti og verður málið rannsakað frekar.