Tap Ford stóreykst milli ára

Bandaríski bílaframleiðandinn Ford skilaði 5,8 milljarða dala tapi á þriðja fjórðungi ársins. Þetta jafngildir 400 milljörðum íslenskra króna og er 30 sinnum meira tap en á sama tíma fyrir ári. Ef kostnaður vegna uppsagna starfsmanna og önnur hagræðing er undanskilin taprekstrinum þá nemur tapið 1,2 milljörðum dala eða tæpum 83 milljörðum króna.

Ford hefur átt við viðvarandi hallarekstur að stríða síðustu misserin og hefur í því augnamiði að snúa rekstrinum sagt upp 45.000 manns á næstu tveimur árum í Bandaríkjunum og Kanada og loka 16 verksmiðjum.

Alan Mulally, nýráðinn forstjóri bílaframleiðandans, segir niðurstöðuna óásættanlega.

Stærstu bílaframleiðendur Bandaríkjanna hafa sömuleiðis skilað tapi vegna minni sölu á sportjeppum en bandarískir neytendur hafa í auknum mæli keypt minni og sparneytnari bíla eftir að eldsneytisverð tók að hækka.