Óbreyttir stýrivextir í Japan

Seðlabanki Japan tilkynnti í dag að stýrivextir þar í landi yrðu óbreyttir. Stýrivextirnir í Japan hafa verið 0,25 prósent síðan í júlí þegar bankinn ákvað að láta af núllvaxtastefnu sinni og hækka vexti í fyrsta sinn í sex ár.

Greiningardeild Kaupþings segir í Hálffimm fréttum sínum í dag að heldur hafi dregið úr væntingum í Japan um að stýrivextir muni hækka á árinu í kjölfar endurskoðunar á grunni við útreikning á vísitölu neysluverðs sem leiddi til þess að verðbólga mældist minni en áður var talið. Auk þessa hafði bandaríska hagkerfið, stærsta viðskiptaland Japan, hægt á sér.

Deildin segir að aftur á móti stefni núverandi hagvaxtarskeið í að verða lengsta hagvaxtarskeið síðan í lok seinni heimsstyrjaldarinnar. Þá bendi nýjustu hagvísar til þess að bandaríska hagkerfið gæti verið sterkara en fyrri tölur gáfu til kynna. Miðað við orð þau sem seðlabankastjóri Japan lét falla við stýrivaxtaákvörðunina eru taldar auknar líkur á annarri vaxtahækkun fyrir lok árs.

Seðlabankastjórinn áréttaði þá stefnu seðlabankans að hækka vexti jafnt og þétt að óbreyttum verðbólguhorfum og áframhaldandi gangi í hagkerfinu. Jafnframt yrði staðið í vegi fyrir að lágt vaxtastig hryndi af stað offjárfestingu þar í landi.