Byggingakostnaður DR fór langt fram úr áætlun

Kostnaður við byggingu nýs húss danska ríkisútvarpsins (DR) í Ørestaden í Kaupmannahöfn hefur farið 600 milljónir danskra króna eða tæplega 7,2 milljarða íslenskra króna fram úr kostnaðaráætlun.

Þetta kom fram á blaðamannafundi stjórnar DR klukkan 16 að dönskum tíma í dag.

Fram kom á fundinum að bygging hússins reyndist erfiðari en áður var áætlað og því hafi kostnaðurinn farið fram úr öllu valdi. Sér DR ekki annan kost í stöðunni en að taka lán vegna umframkostnaðarins og framkvæmdanna.

Danska dagblaðið Berlingske Tidende hefur eftir Kenneth Plummer, forstjóra DR, á fundinum að hann hafi vitað þetta í um hálfan mánuð og hafi honum brugðið þegar hann sá tölurnar. Þá muni tafir við byggingu hússins hafa orðið til þess að afhending hússins dragist fram til sumars árið 2008 en upphaflega stóð til að afhenda það í desember á þessu ári.

Ennfremur sagði hann að ekki verði stokkað upp hjá DR vegna þessa. Hvorki verði neinum sagt upp né dagskrárliðir felldir niður.

Bent Fjord, fjármálastjóri DR, sagði af sér í dag vegna málsins.