Aðhalds enn þörf að mati OECD

Í nýútkominni hagspá Efnahags- og framfarastofnunarinnar (OECD) fyrir aðildarríkin er gert ráð fyrir að efnahagslegt ójafnvægi verði áfram umtalsvert á Íslandi þrátt fyrir að draga muni saman í hagkerfinu á næstu misserum.

Því sé helsta áskorunin sem íslensk stjórnvöld standa frammi fyrir að ná árangri í að vinda ofan af ójafnvægi í hagkerfinu svo að frekari óróleiki á fjármálamarkaði nái ekki að koma aðlöguninni úr jafnvægi. Spáir stofnunin eins prósents hagvexti á næsta ári en að vöxturinn glæðist á ný 2008 og verði 2,5 prósent.

Í skýrslunni segir jafnframt að frekara aðhalds sé þörf í peningamálum á næstunni til að ná niður verðbólgu og halda væntingum niðri hér á landi. Fjármálastefnan ætti að miða að því að forðast að kynda undir innlendri eftirspurn til að vega upp á móti þeim þensluáhrifum sem fyrirhugaðar skattalækkanir munu hafa í för með sér.

OECD telur einnig að hætta sé á ofhitnun hagkerfisins í Noregi, Danmörku og Svíþjóð og mælir með hækkun stýrivaxta þar. Þar að auki telur stofnunin að hægja muni á stærstu hagkerfum heims á næstunni, í Japan, Bandaríkjunum og á evrusvæðinu. Vöxtur verði hins vegar mikill í Kína, á Indlandi og í Rússlandi.