Fall í olíukaup­höllinni

Norski hlutabréfamarkaðurinn hefur ekki átt sjö dagana sæla eftir að olíuverð tók að lækka en markaðurinn er mjög háður því og því oft kallaður Olíukauphöllin.

Á mánudaginn lækkaði markaðsvirði kauphallarfélaga í Osló um sex hundruð milljarða króna þegar aðalvísitalan féll um 3,44 prósent. Frá því að hún náði hæsta gildi frá upphafi í maí nemur lækkun hennar um fimmtán prósentum. Norski markaðurinn rétti vel við sér í gær þegar olíuverð hækkaði á nýjan leik.

En söluþrýstingur á félögum, sem tengjast olíugeiranum, hefur einnig smitast til annars konar fyrirtækja. Eitt þeirra félaga sem hefur fallið hvað mest að undanförnu er Opera Software sem Íslendingurinn Jón S. von Tetzchner stýrir. Á einum mánuði hefur gengi hlutabréfa Operu lækkað um fjörutíu prósent.