Olía lækkar í verði

Hráolíuverð lækkaði nokkuð á helstu mörkuðum í dag í kjölfar fregna frá bandaríska orkumálaráðuneytinu þess efnis að þótt olíubirgðir hefðu dregist saman á milli vikna þá væru þær nokkuð yfir meðallagi.

Verð á hráolíu, sem afhent verður í næsta mánuði, lækkaði um 60 sent í rafrænum viðskiptum í kauphöllinni í New York í Bandaríkjunum og fór í 72,45 dali á tunnu um miðjan dag. Verð á Norðursjávarolíu, sem afhent verður í október, lækkaði hins vegar um 77 sent og fór í 73 dali á tunnu. Þá lækkaði verð á Norðursjávarolíu, sem afhent verður í næsta mánuði, um 80 sent í dag og fór í 73 dali á tunnu.

Olíuverð fór hæst í 78,40 dali á tunnu um miðjan síðasta mánuð með annars vegna innrásar Ísraelshers í suðurhluta Líbanon og í kjölfar þess að olíufélagið BP varð að hætta olíuvinnslu í Prudhoeflóa í Alaska tímabundið eftir að leki kom upp í olíuleiðslum fyrirtækisins.

Verðið hefur lækkað ört í þessari viku, ekki síst vegna vopnahlés Ísraelshers og Hezbollah-samtakanna, sem tók gildi á mánudag og vegna þess að BP hóf olíuvinnslu að nýju í Alaska.