Kemur Finnum í opna skjöldu

Kaup Roberts Tchenguiz á yfir átta prósenta hlut í finnska fjármálafyrirtækinu Sampo, fyrir 60 milljarða króna, hafa komið verulega á óvart í finnskum fjármálaheimi, enda Tchenguiz algjörlega óþekkt nafn þarlendis. Hollenska eignarhaldsfélagið Exafin, sem er í eigu Tchenguiz, er þar með orðið þriðji stærsti hluthafinn í Sampo á eftir finnska ríkinu og Varma lífeyrissjóði.

Mikill samgangur hefur verið með hinum íransk-ættaða Tchenguiz og KB banka undanfarin misseri og er talið að kaupin séu gerð með vitund stjórnenda KB banka og jafnvel talið líklegt að hugmyndin að kaupunum sé þaðan komin. Í viðskiptaútgáfu Helsingin Sanomat eru getgátur um að KB banki hafi selt Tchenguiz hlutabréf sín í Sampo en 54 prósent hlutafjár eru í eigu erlendra aðila. Stjórn KB banka hefur heimild til að auka hlutafé bankans um 100 milljarða að markaðsverði og gæti þannig skipt á eigin bréfum fyrir bréf í Sampo ef bankinn hefði hug á að eignast bréf á ný.

Sérfræðingar segja að Sampo, sem er sjöundi stærsti banki Norðurlandanna, hafi verið leiðandi í því að taka yfir og sameinast öðrum fjármálafyrirtækjum. Forstjórinn Björn Wahlroos þykir slyngur í viðskiptum og iðinn við að koma á óvart. "Sampo er áhugavert félag af því að það starfar bæði á banka- og tryggingamarkaði," segir Bengt Dahlström, sérfræðingur hjá EQ banking.