Forseti Íslands fundaði með fulltrúum Google

Fulltrúar alþjóðlega internetfyrirtækisins Google hafa áhuga á að nýjar starfsstöðvar fyrirtækisins verði knúnar með vistvænni orku. Þetta kom fram á fundi þeirra með Ólafi Ragnari Grímssyni, forseta Íslands, hér á landi á dögunum.

Örnólfur Thorsson forsetaritari segir vistvæna orku meðal þess sem rætt var um á fundinum. Hann vill þó ekkert segja til um hvort fulltrúar Google hafi lýst áhuga á að setja upp starfsstöðvar á Íslandi en hér er orka framleidd með vistvænum hætti, öfugt við það sem gerist víða annars staðar.

"Á fundinum var meðal annars rætt um þróun íslensks viðskiptalífs í alþjóðlegu samhengi, einkum á sviði hugbúnaðar og tækni. Jafnframt var rætt um íslenskt viðskipta- og tæknisamfélag og þróunina hérlendis í hátækni- og rannsóknarstörfum," segir Örnólfur.

Þá ræddu forsetinn og fulltrúar Google um áhuga Íslendinga á að sækja sér alþjóðlega menntun. Google er öflugasta og mest notaða leitarvélin á netinu. Fyrirtækið var stofnað 1998 og hefur vaxið og dafnað síðan og eru starfsmenn þess nú um fimm þúsund.