Forsetafrúnni líður ágætlega

Dorrit Moussaieff forsetafrú mun gangast undirlæknisrannsókn í dag.

Eins og Fréttablaðið greindi frá í gær þá fékk Dorrit aðsvif við upphaf afhendingar Íslensku bókmenntaverðlaunanna á miðvikudag.

Aðspurður um líðan Dorritar segir Örnólfur Thorsson, forsetaritari, að hún hafi farið í rannsókn á sjúkrahúsi í gærmorgun. Þar dvaldi hún í nokkrar klukkustundir og hélt síðan aftur heim á Bessastaði. Henni leið ágætlega og ætlaði að reyna að hvílast. 

Dorrit fer aftur á sjúkrahús í dag svo mögulegt sé að ljúka þeim rannsóknum sem læknar vilja að hún gangist undir.