Styttist í tónlistarverðlaunin

Undirbúningur fyrir afhendingu Íslensku tónlistarverðlaunanna fyrir árið 2004 hefur staðið yfir frá því í haust. Verðlaunin verð afhent miðvikudaginn 2. febrúar í Þjóðleikhúsinu. Þetta verður í 11. skipti sem verðlaunin verða afhent og verður hátíðin sýnd í beinni útsendingu Sjónvarpsins.

Íslensku tónlistarverðlaunin eru hugsuð sem vegsauki fyrir íslenska tónlist; flytjendum, höfundum og útgefendum til hvatningar. Hátíðin verður að vanda þéttsetin íslenskum stórstjörnum. og munu meðal annars koma fram:

MEZZOFORTE

HJÁLMAR

RAGNHEIÐUR GRÖNDAL

BRAIN POLICE

JAGÚAR

OG FLEIRI

Einnig koma fram Lúðrasveit Reykjavíkur, Bubbi Morthens, Camilla Söderberg, Jón Jósep Snæbjörnsson, Sigmundur Ernir Rúnarson, Þorgeir Ástvaldsson, Edda Andrésdóttir, Egill Ólafsson, Selma Björnsdóttir, Ragnhildur Gísladóttir, Logi Bergman Eiðsson, Steinar Berg Ísleifsson, Stefán Hjörleifsson, Bjarni Guðmundsson, Tinna Gunnlaugsdóttir, Tryggvi Baldvinsson, Ragnhildur Steinunn Jónsdóttir og Nylon.

Viðhafnargestir og glæsileg aukaverðlaun

Forseti Íslands hr. Ólafur Ragnar Grímsson mun að vanda afhenda heiðursverðlaun Íslensku tónlistarverðlaunna. Menntamálaráðherra Þorgerður Katrín Gunnarsdóttir mun flytja ávarp og Iðnaðarráðherra Valgerður Sverrisdóttir afhendir ein af aðalverðlaunum kvöldsins.

Borgarstjórinn í Reykjavík, Steinunn Valdís Óskarsdóttir afhendir sérstök útflutningsverðlaun "Loftbrúar Reykjavíkur" en í fyrra voru þau afhent í fyrsta skitpti. Það var hljómsveitin Mínus sem hreppti þessi eftirsóttu verðlaun í fyrra en þau eru veitt fyrir góðan árangur í útflutningi á íslenskri tónlist. Verðlaunin eru ekki af verri endanum því þau tryggja verðlaunahafa flug og flutningsfríðindi á erlendri grundu í heilt ár.

Kjartan Ólafsson formaður Samtóns afhendir svo Hvatningarverðlaun Samtóns en þau eru veitt þeim sem hafa unnið með einum eða öðrum hætti að auknu brautargengi fyrir íslenskt tónlistarlíf.

Framkvæmdastjórn og undirbúningur

Einar Bárðarson hefur stjórnað framkvæmdum á undirbúningi verðlaunanna fyrir SAMTÓN ásamt stjórn Íslensku tónlistarverðlaunanna síðustu fjögur ár. Á þeim árum hefur umfang verðlaunanna aukist mjög mikið og eru þau nú glæsileg uppskeruhátíð alls tónlistarfólks í landinu. Áhorf á útsendingu Sjónvarpsins frá síðustu verðlaunahátíð var mælt og var samanlagt áhorf á útsendinguna 51 prósent. Það er staðfesting á því að verðlaunin hljóta verskuldaða athygli hjá landsmönnum.

Saga Íslensku tónlistarverðlaunanna

Verðlaunin voru fyrst afhent fyrir starfsárið 1993. Það var stjórn Rokkdeildar Félags íslenskra hljómlistarmanna sem stóð fyrir afhendingunni og fór hún fram í apríl árið 1994. Í dag eru það Samtónn, samtök flytjenda, tónhöfunda og útgefenda sem bera veg og vanda af Íslensku tónlistarverðlaununum.

Bakhjarlar Íslensku tónlistarverðlaunanna eru Landsbankinn, Icelandair og Vísir.