Tilkynning frá HSÍ vegna Viggó

Stjórn Handknattleikssambands Íslands sendi frá sér tilkynningu vegna máls Viggós Sigurðssonar landsliðsþjálfara, en honum var fylgt út úr Leifsstöð af lögreglu eftir að hafa lent í útistöðum við flugþjón í vél Flugleiða síðasta sunnudag. Viggó var á leið heim frá Svíþjóð með ungmennalandsliðinu í handknattleik. Hér má lesa yfirlýsinguna í heild sinni: S.l sunnudag átti það leiðindaatvik sér stað að Viggó Sigurðsson þjálfari U-21 árs landsliðsins í handknattleik hafði áfengi um hönd á heimleið með liðið frá keppni erlendis, jafnframt þreif hann til flugþjóns sem var að sinna sjálfsögðum öryggisskyldum í starfi. Forsvarsmenn Handknattleikssambands Íslands líta þessa uppákomu mjög alvarlegum augum, og vill í framhaldi af því benda á að áfengisneysla í ferðum á vegum HSÍ á ekki að eiga stað. Á fundi í hádeginu í dag með forráðamönnum sambandsins baðst Viggó Sigurðsson afsökunar á framferði sínu. Jafnframt hefur Viggó hitt viðkomandi flugþjón úr þessari ferð og beðið hann afsökunar. HSÍ hefur í dag farið yfir málið með Flugleiðum og er full sátt og eining á milli Flugleiða og HSÍ. F.H HANDKNATTLEIKSSAMBANDS ÍSLANDS. Með kveðju. Einar Þorvarðarson Framkvæmdastjóri HSÍ.