Leiklistin í víðum skilningi

Leiklistardeild Listaháskóla Íslands stendur í dag fyrir kynningu á hinni nýju BA-námsbraut <I>Leiklist - fræði & framkvæmd<P> sem verður í boði frá og með næsta hausti. Í uppbyggingu brautarinnar er leitast við að líta á leiklist í sem víðustum skilningi og er námið hugsað sem vettvangur fyrir bæði fræðilegar og listrænar rannsóknir á leiklist. Áhersla verður lögð á sögu, eðli, hlutverk og mörk leiklistarinnar, tungumál hennar og snertifleti við aðrar listgreinar. Nemendum gefst kostur á að kynna sér leikstjórn, dramatúrgíu og/eða leikritun. Námið er hugsað fyrir þá sem áhuga hafa á að kljást við leiklistarformið í sem víðustum skilningi og er auk þess hugsað til undirbúnings fyrir framhaldsnám í leiklistartengdum fræðum. Umsóknarfrestur er til 1. apríl 2005. Þessi námsbraut verður, eins og áður sagði, kynnt nánar í dag milli kl. 17 til 19 í LHÍ, Hráa salnum að Sölvhólsgötu 13, Reykjavík.