Stjarnan í eldlínunni

Stjarnan í Garðabæ keppir í dag við pólska liðið Vitarel Jelva í 16 liða úrslitum áskorendakeppni Evrópu í handknattleik. Stjörnustúlkur freista þess að komast í 8 liða úrslit keppninnar og ákváðu því að kaupa heimaleik pólska liðsins og því verða báðir leikirnir háðir hér á landi. Liðin mætast klukkan 15.15 í dag og er aðgangur ókeypis. Kostnaður Stjörnunnar við þátttökuna um þessa helgi er 1,7 milljónir króna en með aðstoð fyrirtækja tekst að ná endum saman. Með því að fylla húsið vonast Garðbæingar til þess að Stjarnan slái pólska liðið út úr keppninni.