Samskip hyggja á landvinninga

Gríðarlegur vöxtur hefur verið í starfsemi Samskipa erlendis og jókst veltan um fjörutíu prósent á síðasta ári. Félagið hyggur á frekari landvinninga, meðal annars langt inn í Rússland og í Asíu. Undanfarin ár hefur vöxtur skipafélagsins aukist jafnt og þétt. Hagnaður af fyrirtækinu árið 2003 var 366 milljónir króna og áætlaðar rekstrartekjur er um 24 milljarðar. Þá er félagið nýbúið að taka við fyrsta sérsmíðaða íslenska kaupskipinu í áratug og annað verður afhent í þessum mánuði. Segja má að starfsemi Samskipa sé skipt í tvennt, annars vegar starfsemi á Íslandi og hins vegar starfsemi á erlendri grundu, en henni er stjórnað frá höfninni í Rotterdam.  Vöxtur félagsins hefur einkum verið í erlendri starfsemi. Ásbjörn Gíslason, forstjóri Samskipa, segir að umsvif erlendis hafi aukist jafnt og þétt undanfarin ár og nú sé svo komið að Samskip séu komin með fimmtán fyrirtæki í fimmtán löndum og reki skrifstofur á um 30 stöðum fyrir utan Ísland. Samskip nýta einkum heimamenn á starfssvæðum sínum en keypt hafa verið upp félög sem voru í fullum rekstri. Ásbjörn að fyrirtækið hafi farið óhikað í landvinninga og náð þannig í aukna markaðshlutdeild. Samskip eru með skip, gáma, flutningbíla og járnbrautarlest í sínum rekstri og er nýtingin góð að sögn Ásbjörns. Meðal þeirra svæða sem Samskip hefur siglt til eru olíuvinnslusvæðin við Kaspíahaf, Túrkmenistan og þar um slóðir, en Samskip sjá sóknarfæri í Rússlandi og í Asíu þar sem félagið hefur komið sér upp skrifstofum. Ásbjörn segir að félagið sjái mörg tækifæri í Rússlandi og Austur-Evrópu og þar sé starfsemi þess umtalsverð. Í Rússlandi og Eystrasaltsríkjunum vinni um 150 manns fyrir félagið.