Gaf leyfi til yfirflugs

Halldór Ásgrímsson forsætisráðherra staðfesti í umræðum um störf þingsins á Alþingi í gær að íslensk stjórnvöld hefðu veitt Bandaríkjamönnum leyfi til yfirflugs og notkun Keflavíkurstöðvarinnar vegna vaxandi spennu í Írak þegar í febrúar 2003. Þetta kom fram í máli forsætisráðherra eftir að Össur Skarphéðinsson, formaður Samfylkingarinnar, spurði hann um efni fréttar Stöðvar 2 um málið í gærkvöld. Össur vitnaði til orða Halldórs daginn fyrir innrásina um að öryggisráðið ætti að hafa síðasta orðið. "Þetta sagði hann þremur vikum eftir að hann sem utanríkisráðherra leyfði að flogið yrði um lofthelgi landsins og herflugvélar hefðu hér viðdvöl vegna innrásarinnar í Írak. Nú virðist mega draga þá ályktun að stuðningur Íslands hafi komið fram þremur vikum fyrr en áður var sagt." Halldór Ásgrímsson vísaði því á bug að með þessu hefði verið lýst yfir stuðningi við stríð í Írak og benti á að liðsflutningar til Persaflóa hefðu hafist löngu fyrir febrúar. Ísland hefði gefið leyfi til yfirflugs á svipuðum tíma og Þjóðverjar, sem hefðu gefið sitt leyfi jafnvel þótt þeir hefðu verið á móti innrásinni. "Við höfum aldrei hafnað beiðni bandamanna okkar um yfirflug en flutningarnir fóru að mjög litlu leyti um Keflavík". Til mjög hvassra orðaskipta kom á milli Halldórs og Össurar og var formaður Samfylkingarinnar sakaður um að nota ræðustól Alþingis í baráttu sinni fyrir endurkjöri til formanns. Ögmundur Jónasson, þingmaður Vinstri grænna, sagði ástæðu til að ræða þetta mál daglega í þinginu þar til sannleikurinn hefði verið leiddur í ljós: "Listinn yfir hinar vígfúsu þjóðir hafði það að markmiði að grafa undan Sameinuðu þjóðunum og öryggisráðinu. Hann hefur stórpólitíska þýðingu og er stórpólitískt utanríkismál."