Opnir tímar í tréskurði

Tréskurður tilheyrir bæði tómstundagamni og nytjalist og þá kúnst er hægt að læra á Vesturgötu 7 í Reykjavík. Leiðbeinandi er Sigmundur Hansen og hann segir alla velkomna í tíma, á hvaða aldri sem þeir eru. "Margir halda að þessi staður sé bara fyrir eldri borgara en það er misskilningur. Hingað er öllum frjálst að koma til að taka þátt í því sem fram fer," segir hann og undir það tekur Harpa Rún Jóhannsdóttir, forstöðumaður. "Félagsstarfið er fyrir alla Reykvíkinga og er opið virka daga frá 9 til 17." Tréskurðurinn er á dagskránni á miðvikudögum milli kl. 13 og 16 og þar verða margir fallegir munir til. Sigmundur kveðst yfirleitt forvinna hlutina heima því hann sé mikill föndurkarl. "Síðan legg ég þetta uppí hendurnar á fólkinu og kenni því handbrögðin. Eitt aðalmálið er að finna út hvernig liggur í viðnum, því það verður að beita hnífunum eins og æðarnar liggja," segir hann og heldur áfram. "Við eigum tólf járn og lánum þau byrjendum en ef fólk vill halda áfram þá kaupir það sér áhöldin sjálft. Sumir fá sér sett með þremur hnífum og halda áfram að tálga heima hjá sér en koma svo yfirleitt aftur og fá frekari leiðbeiningar." Á Vesturgötunni eru hin ýmsu námskeið í gangi, auk tréskurðarins, svo sem myndlist, bútasaumur, skrautskrift og postulínsmálun. Þar fyrir utan er spilað og teflt og einn dagskrárliður heitir Spurt og spjallað. Föstudagarnir eru alskemmtilegastir, þá er safnast við flygilinn og sungið og svo dansað í aðalsalnum á eftir. Föstudagarnir heita líka "sparidagar"!