Verklegt nám í ensku

Enskuskólinn var stofnaður 1986 af Julie Ingham enskukennara."Við höfum alltaf lagt mestu áhersluna á talmálið og flokkum nemendur í sex aðalstig eftir talgetu. Innan hvers stigs eru þrjú meginnámskeið þannig að alls er hægt að fara í gegnum 18 sérnámskeið. Allir kennarar skólans hafa ensku að móðurmáli og sérmenntun í enskukennslu fyrir útlendinga. Nemendur koma í viðtal við kennarann áður en námið hefst þar sem geta þeirra er metin og út frá því ákveðið á hvaða stigi nemandinn á best heima." Hvert námskeið hefur ákveðið markmið og þá má segja að sé komið að verklega þættinum í náminu." Á byrjendanámskeiðunum fer kennarinn út með nemendurna og markmiðið er æft við raunverulegar aðstæður. Nemandinn hefur það kannski að markmiði að geta pantað sér mat á veitingahúsi og þá fer hann með kennaranum á veitingahús og pantar matinn sinn á ensku." Lengra komnir nemendur halda smáfyrirlestra þar sem þeir æfast í að nota orðaforðann sem þeir hafa safnað á námskeiðinu. "Í skólanum er afslappað andrúmsloft, takmarkaður fjöldi á hverju námskeiði og áhersla lögð á að nemendum líði vel og nái markmiðum sínum. Í ár erum við með umræðuhópa, til dæmis um kvikmyndir, til að hjálpa fólki að tjá sig á ensku um það sem það hefur áhuga á." segir Julie. "Að námskeiði loknu hjálpum við fólki að velja sér framhald og bjóðum því til dæmis aðstoð við að finna enskuskóla í Englandi ef okkur finnst það vera næsta skref." Af öðru starfi Enskuskólans má nefna námskeið fyrir börn á aldrinum fimm til fimmtán ára, bæði þau sem eru að flytja til enskumælandi landa og líka viðhaldsnámskeið fyrir börn sem hafa búið úti og vilja ekki gleyma málinu. Í Enskuskólanum er alltaf kennt á laugardögum en allar aðrar upplýsingar má finna á www.enskuskolinn.is