Verðbólgan hefur tvöfaldast

Verðbólga hér á landi mælist nú 2,8% og hefur hún nær tvöfaldast frá áramótum samkvæmt samræmdri vísitölu neysluverðs sem Hagstofan birti í morgun. Eftir að hafa haldist lág og undir meðaltalsverðbólgu í viðskiptalöndum Íslands allt frá lokum árs 2002 hefur þróunin snúist við og mælist verðbólgan hér á landi nú meiri en í ESB-ríkjunum og á evrusvæðinu, annan mánuðinn í röð. Í morgunkorni greiningardeildar Íslandsbanka segir að staða hagkerfisins í alþjóðlegum samanburði hafa því versnað hvað þetta varðar að undanförnu. Þótt munurinn á verðbólgunni hér og í viðskiptalöndunum sé nú lítill í samanburði við þann mun sem mældist þegar verðbólgan rauk hér upp í lok árs 2001 í kjölfar skarprar gengislækkunar krónunnar, ber að líta á aukna verðbólgu sem viðvörunarmerki að sögn Íslandsbanka. Verðbólgan nú er umfram það sem ásættanlegt getur talist. Hún er umfram verðbólgumark Seðlabankans, umfram verðbólguna í þeim löndum sem við viljum helst bera okkur saman við, hún vegur að kaupmættinum og kemur niður á samkeppnisstöðu innlendra fyrirtækja samkvæmt Íslandsbanka. Seðlabankinn hefur nú þegar brugðist við þessu með vaxtahækkunum upp á 0,95%. Að mati greiningardeildar Íslandsbanka mun bankinn herða aðhaldið enn frekar á næstu mánuðum.