Sædís Ósk Helgadóttir 11 ára

Sædís Ósk Helgadóttir er nýkomin úr sumarbústað í grennd við Hveragerði með vinkonum sínum og dregur aðeins við sig jáið þegar hún er spurð hvort hún hlakki til þegar skólinn byrjar. Hún er ekkert sérstaklega spennt enda gaman að vera í fríi þegar veðrið er svona gott. Sædís er 11 ára og fer í 6. bekk Árbæjarskólans í Reykjavík. Hann hefur verið skólinn hennar frá upphafi en hins vegar kveðst hún fá nýjan kennara í ár og veit ekki enn hver það verður. Þótt henni þyki sumar námsbækurnar skemmtilegar eins og til dæmis íslenskubækurnar Skinna I og II sem hún las í þriðja bekk eru íþróttir og verklegar greinar í meira uppáhaldi, svo sem smíði, saumar og heimilisfræði. "Stærðfræðin var reyndar mitt besta fag," segir hún og bætir við: "En hún er það ekki lengur. Þetta er allt orðið flóknara."