Tvö skalla­mörk tryggðu KR sigur á Val og sigur í Reykja­víkur­mótinu

KR er Reykjavíkurmeistari annað árið í röð eftir 2-0 sigur á erkifjendum sínum í Val í úrslitaleiknum í kvöld.

Liðin mættust á Origo-vellinum í kvöld og Kristján Flóki Finnbogason kom KR yfir á síðustu mínútu fyrri hálfleiks með skallamarki.

Ekki skánaði ástandið fyrir Valsmenn er Sigurður Egill Lárusson fékk sitt annað gula spjald og þar með rautt á 62. mínútu.

Sex mínútum síðar gerðu KR-ingar svo út um leikinn er Ægir Jarl Jónasson skoraði einnig með skalla.

Valsmenn gátu minnkað muninn úr vítaspyrnu í uppbótartíma en Guðjón Orri Sigurjónsson varði spyrnu Kristins Freys Sigurðssonar.

Þetta er í 39. sinn sem KR stendur uppi sem sigurvegari í Reykjavíkurmótinu.

Úrslit og markaskorarar eru fengnir frá Fótbolti.net.