Valinn í stærstu liðakeppni heims dögum eftir sigurinn

Mikið hefur gerst á síðustu dögum fyrir Óliver Elí en hann vann eitt stærsta áhugamannamót fyrir kylfinga yngri en átján ára. Eftir sigurinn hefur Óliver Elí verið valinn á Jacques Légalise Trophy-mótið.

Þar mætast kylfingar frá Bretlandi og Írlandi gegn sameiginlegu liði Evrópu. Óliver Elí mun vera hluti af Evrópuliðinu en mótið fer fram 21.-22. ágúst. Mótið er haldið á hverju ári og í ár verður leikið á The Island Golf Club á Írlandi.

Jon Rahm, Tommy Fleetwood og Justin Rose eru einungis nokkrir af þeim fjölmörgu atvinnumönnum sem hafa tekið þátt á þessu móti. Óliver Elí verður annar Íslendingurinn til að keppa á þessu móti en Gísli Sveinbergsson var valinn á mótið árið 2015.

Óliver Elí fær aðeins nokkurra daga pásu en hann er nýkominn heim eftir sigurinn á Opna breska áhugamannamóti pilta. Hann getur haldið áfram að spreyta sig gegn sterkustu kylfingum heims undir átján ára aldri og vonandi nær hann að tengja saman tvo sigra.