Gunn­laugur Árni setti heilsuna í fyrsta sæti

Vísir sagði í gær frá því að Gunnlaugur Árni hefði hætt keppni eftir ellefu holur þar sem hann var kominn ellefu höggum yfir par.

Nú vitum við meira um ástæðu þess að þessi stórefnilegi kylfingur gat ekki klárað hringinn og hver var aðalástæðan fyrir því að allt gekk á afturfótunum.

Gunnlaugur Árni hefur verið að glíma við meiðsli í smá tíma og þurfti þarna að taka afar erfiða ákvörðun á milli þess að pína sig áfram eða hugsa um framhaldið á ferlinum.

„Ég hef verið að díla við meiðsli í smá tíma og þurfti að taka ákvörðun um að setja heilsuna í fyrsta sæti,“ sagði Gunnlaugur Árni í stuttu spjalli við Vísi.

„Það er mjög leiðinlegt að þurfa að hætta í golfmóti í fyrsta skipti en heilsan til lengri tíma er mikilvægari,“ sagði Gunnlaugur Árni.

Gunnlaugur Árni hefur átt magnað ár þar sem hann keppti meðal annars fyrstur íslenskra karlkylfinga á Opna bandaríska risamótinu en núna mun hann vinna að því að ná sér af þessum meiðslum.